lgbt32lesbians

Sa kanyang boses at mga mata

Written by

Sunday, 10 April 2016 - Last Updated on May 3, 2016
lgbt32lesbians

lgbt32lesbiansAng sarap pakinggan ng boses niya. Napakalamig sa pandinig. Para kang hinehele at kung minsan naman ay para kang kinikilig kung saan ang lahat ng iyong balahibo ay patungo sa direksyon niya. Hindi ko akalain may tinatago siyang napakagandang tinig. Kuntento na kasi ako sa ganda ng boses nito kapag kausap sa telepono o ‘di naman kaya ay personal na kausap ito. Matagal na kaming magkakilala pero hindi direktang magkabarkada dahil iyong kaibigan niya ang kaibigan ko. Isa pa, hindi ko naman siya gaanong napapansin noon dahil nakatutok sa dating karelasyon. Iyon nga ang reklamo ng lahat, may mga kaibigang nakakalimutan ang ibang kaibigan kapag nasa relasyon sila. Guilty ako doon.

Noong mga oras ko lang napansin na ang kanyang mga mata naman ay may kasingkitang hindi maikukumpara sa iba. Napakayabang ng dating sa una subalit ang mayabang na dating na iyon ang nakabighani sa maraming babaeng natitipuhan siya. Mayabang ang dating niya kaya iyon din ang dahilan kung kaya hindi ko siya gaanong pinagpapapansin. Subalit,  napapawi ng kanyang ngiti ang mayabang na dating at porma. Agad na gumagaan ang loob ng sino man sa kanya upang bawiin ang naunang persepsyong nakaiinis ang maangas na dating niya.

Pinagmamasdan habang paparating siya sa pulutong ng mga kasamang kaibigan, parang may kung anong tibok sa puso ko ang tumalon sa tuwa noong tumabi ito sa akin at maaliwalas ang mukhang nagtatanong ng kung ano anong bagay ukol sa akin. Hindi kasi kami talaga dikit noon kaya ngayon pa lang kami nagkakatanungan. Iyon naman usap namin sa telepono noon ay mas tungkol pa sa kaibigan naming naaksidente at kailangang tulungan. Pwede ring nabalitaan nitong bagong hiwalay ako kaya inaaliw ng mga kaibigan lumabas. Totoo nga ang sinasabi nilang mabait ang taong ito at maayos na kasama. Kahit pa piling pili lang ang kanyang mga sinasabi ay parang ang dami na naming napagkwentuhan para sa bago lang ‘nagkakilala’.

Gaya ng nasabi, katatapos lang ng relasyon ko noon kaya pwedeng naaaliw ako sa kanya kaya tila ang dali kong mahulog sa kanya. Oo, malakas nga ang dating niya pero hindi ko pa siya masyadong kakilala para magustuhan nang ganoon kabilis. Matapos ang dinner naming magkakaibigan na extended sa mga inimbitahang kaibigan sa ibang grupo, nagkayayaan ng videoke upang doon na rin mag-inuman.

Naunang kumanta ang bestfriend ko ng mga pa-sweet na kanta. Appetizer kumbaga. Pampainit bago bumirit ng mga Whitney Houston o Mariah Carey ang ibang makukulit na kasama. Panay pa rin ang kwentuhan namin sabay lagok ng iniinom na beer.  May hinahanap siyang kanta at kinuha ang remote control upang ipasok ang numero ng napiling kanta. Ilang saglit pa ay tumayo ito at kinuha ang mikropono. Ang linis ng boses. Napatahimik kaming lahat at nakatitig kaming lahat sa kanya. Naluha ako sa kanta niya kasi paborito namin iyon ng ex ko pero hindi ko pinahalata. Lumabas ako para mag-CR at para makahinga sa kinanta niyang may kung anong dagok sa dibdib ko. Hindi ko alam kung nami-miss ko ba ang ex ko sa kinanta niya o nagugustuhan ko siya. Nalilito ako.

Ayokong masyadong paniwalaan ang nararamdaman ko sa panahong napaka-vulnerable ko. Masakit pa ang pinagdadaanan iyon at hindi iyong madadaan ng isang kanta pero aaminin ko ay hindi na ako makatulog dahil paulit-ulit kong nakikita ang mga mata niya habang kinakanta iyon. Wala pa akong pinagsasabihan pero napapanaginipan ko na siya. Kakaiba ang pakiramdam pero ayaw kong patulan. Paano kung nadadala lang ako ng sakit na nararamdaman ko? Paano kong naaaliw lang ako sa ideyang may ganung nilalang sa harap ko na tila kayang pawiin ng kanyang mga mata at boses ang sakit na nararamdaman ko? Napakaaga para tumalon at magdesisyon. Palilipasan ko muna ang panahon hanggang maging normal ang mga panaginip ko at boses na naririnig magmula noong gabing iyon.

 

Photo from Pixabay. Public domain.

Eva Callueng (55 Posts)


Write a comment

Your email address will not be published. Required fields are marked *

*


You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>