Pride march eyeball

Written by

Sunday, 26 June 2016 - Last Updated on February 5, 2017

lgbt32lesbiansMakikita ko na naman siya sa Pride March. Doon ko lang kasi siya nakikita kaya panay ang punta ko at aagahan ko pa para walang masayang na sandali. Kahit may girlfriend na siya ayon sa huli kong balita tuingkol sa kanya, okay na ako na makita ko man lang siya kasi minsan sa isang taon.

Siya iyong klase ng crush na kapag nakita mo ay matinding matindi ang nararamdaman at unti-unting nawawala dulot ng kawalan ng komunikasyon namin. Bagaman personal kaming magkakakilala at panaka-nakang sinisilip ko ang mga status niya sa Facebook, kami iyong kwento na hanggang kwento na lang dahil wala ng ibang patutunguhan pa.

Noong 2014, personal kaming nagkakilala ni Kyla. Inadd ko siya sa  Facebook noong minsang nag-comment siya sa status ng common friend namin kung saan nag-comment rin ako. Sabihin na nating nabighani ako sa lumabas na notification lalo pa na direktang komento ito sa sinabi ko.  Humaba ang usapang iyon kung kaya agad-agad ko siyang inadd sa Facebook. Inaccept naman niya kaagad kaya may mga panaka-nakang like kami sa mga status ng bawat isa. Noong taong din iyon kami nagkakilanlan nang mahusay. Nakatakda kaming magkita sa Pride March. Sabi ng common friend naming si Gina masayahin daw si Jenny at madaling pakisamahan. Tamang-tama raw ang timing ko dahil single ito. Tinapik ko si Gina at sinabing hindi gayon ang pakay ko. Inamin kong interesado ako pero hanggang hindi ko pa siya nakikita nang personal ay hindi ko masasabi.

Nang ipakilala ako ni Gina kay Jenny ay nagulat ako sa pagiging masayahin nito para sa unang kakilala. Oo,  nagkikitaan kami sa Facebook subalit iba pa rin ang personal na pagkakakilala. Kasama ang iba pa noong gabing iyon ay pumunta kami sa inuman. Napaparami na ang inom ko kaya naging madaldal na rin ako. Nagkaigihan kami noong araw na iyon pero may kung anong bagay na pumipigil sa aking tuluyan kaming magkaigihan. Hindi ko maintindihan pero siguro takot ako lalo na at tropa ang datingan namin sa bawat isa. Ayokong masira ang ‘tropa’ mood namin o siguro kuntento na akong hanggang crush na lang.

Noong nakaraang taon, muli kaming nagkita ni Jenny kasama ng mga ‘pride march tropa’. Ganun pa rin, kagaya ng dati, lumagablab ang  nararamdaman ko sa kanya na unti-unting nawawala pagkaraan ng ilang buwan matapos ang aming pagkikita. Siguro ganun nga ang crush, lumilipas din. Noong gabi ng inuman ng pride march ay nabanggit ko sa kanyang crush ko siya. Natawa lang siya. Noong natawa siya at parang hindi sineryoso ang sinabi ko ay nakumpirma ko sa sariling hanggang doon na nga lang kami. Pero hindi niya ako pwedeng pigilan hanggang sa tuluyang maubos ang pakiramdam na ito.

Alas- dos na, kailangan ko nang umalis para i-meet si Gina sa Wendy’s sa Taft. Kung maaga-aga ako, kakain muna ako ng kaunti upang paghandaan ang malayuang lakaran.  Maayos na ang buhok ko sabay winisikan ko ng kaunting pabango ang aking damit. Kagaya ng aking mga kasama, excited na rin silang dumalo sa Pride march. May nagpadala na ng group text kesyo andun na sila at may kainitan ang araw. Muli kong tiningnan ang sarili sa salamin kung handa na muling makita ang ‘pride march tropa’ kung saan madadagdan na kami ng isa dahil kasama na ang girlfriend ni Jenny na crush ko kapag nakikita. Sulong!

Eva Callueng (55 Posts)


Write a comment

Your email address will not be published. Required fields are marked *

*


You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>